2018 оноос Хөдөлмөрийн гэрээний Солонгос хэлний шалгалт өөрчлөгдөж “Онооны тогтолцоо”-нд шилжиж байгаа билээ. Энэ шинэчлэлийн хүрээнд 1-р шалгаруулалт буюу хэлний шалгалтанд тэнцсэн иргэд Ур чадварын шалгалтанд заавал орох болсон.
Ур чадварын шалгалт нь Бие бялдар, ярилцлага, суурь чадварын шалгалтаас бүрдэнэ.
БИЕ БЯЛДАРЫН ШАЛГАЛТЫН ХЭСЭГ
- Гарын хүч хэмжигчээр зүүн баруун гараа тус бүр 1 удаа шалгуулна.
- Гэдэсний хүч хэмжигчээр гэдэсний хүчээ нэг удаа шалгуулна.
- Биеийн өндөр ба жин хэмжигчээр биеийн өндөр болон жингээ хэмжүүлнэ.
Шалгалт өгөхөд анхаарах нь
Шалгалт өгөхийн өмнө осол гэмтлээс сэргийлэн бие халаах дасгал сайтар хийх хэрэгтэй. Та даалгавар биелүүлж эхлэхдээ байрлалаа буруу авсан бол маш бага оноо авч болзошгүй. Хэмжилт бүрийг зөвхөн нэг удаа гүйцэтгэнэ.
Гарын хүч хэмжих
Гүйцэтгэх заавар
- Зогсоо байдлаар хөлдөө мөрний хэмжээтэй зай аваад гараа унжуулсан байдалтай зогсоно
- Гарын хүч хэмжигчийн хэмжилт гарах нүүрэн талыг гадагш харуулж хурууны 2 дахь үеэр атгана
- Гараа шулуун байлгаж гар болон биеийн хооронд 15 градусын өнцөг үүсгэнэ
- Эхлэх дохио дуугармагц боломжит хүчээрээ 2-3 секунд орчим атгана
- Хоёр гараараа ээлжлэн нэг удаа гүйцэтгэнэ
Анхаарах зүйлс: Зөвхөн гарын хүчээ үзүүлэх бөгөөд гараа нугалах юмуу бие оролцуулахыг хориглоно. Шалгах явцад багажийг биедээ хүргэх савлуулахыг хориглоно
Гэдэсний хүч хэмжих
Гүйцэтгэх заавар
- Хэмжилтийн багаж дээр 2 хөлний зайг 15см хэмжээгээр авч зогсоно
- Өвдөг гараа шулуун байлгаж цээжээ 30 градусын хэмжээтэй бөхийлгөн бариулаас зөв атгана
- Бариулыг өвдөгнөөсөө 10 см өндөр байлгаж татахад бэлэн байна
- Эхлэх дохио дуугармагц бөхийсөн цээжин биеэ боломжийн хүчээр татаж бариулаас 3 секунд орчим татна
- Даалгаврыг зөвхөн нэг удаа гүйцэтгэнэ
Анхаарах зүйлс: Гэмтэж бэртэхээс сэргийлэхийн тулд хэмжих багажийг татаж байх үедээ бэлхүүс болон нурууг мурийлгаж болохгүй. Хэмжих багажийг дээш чиглэсэн байдлаар татаж тэнцвэрээ алдахгүй байхыг хичээгээрэй. Нуруу нугасны гэмтэлтэй болон нурууны өвчтэй бол энэ даалгаврыг гүйцэтгэж болохгүй.
Биеийн өндөр ба жин хэмжих
Гүйцэтгэх заавар
- Гутлаа тайлж автомат хэмжигч дээр зогсоно
- Хүзүү нуруугаа цэх болгож биеийн өндрөө хэмжүүлэхээр биеэ тэнийлгэнэ
- Зааврын дагуу хэмжиж дууссаны дараа хэмжигч дээрээс бууна
- Хэмжилтийг нэг удаа гүйцэтгэнэ.
